ئه‌ڤرۆ د.على ته‌ته‌ر پارێزگارێ دهۆكێ پێشوازیا د.ئازاد نجار داهێنه‌رێ كورد یێ چێكرنا دلێ ده‌ستكرد كر و دهه‌ڤدیتنه‌كێ دا به‌حسێ ره‌وشا زانین وزانستێ ل هه‌رێما كوردستانێ و ئه‌و گرنگیا حوكمه‌تا هه‌رێما كوردستانێ دده‌ته بیاڤێ داهێنان وپێشئێخستنێ ب گشتى هاته كرن، خودانێ داهێنانێ ژی پشتەڤانیا خوە دەربری کو سازیەکا گرێدای داهێنانان ل کوردستانێ بهێتە چێکرن دەربری.
پارێزگارێ دهۆكێ خوشحالیا ب سه‌رەدانا ناڤبری بو پارێزگه‌ها دهۆكێ وهه‌رێما كوردستانێ ده‌ربرى و بناڤێ خوە و كارگێریا پارێزگه‌هێ وخه‌لكێ ده‌ڤه‌رێ پیروزباهى وده‌ستخوشى ل دكتورى كر ل دور داهێنانا وى و چێكرنا دلێ ده‌ستكرد و گوت، ئه‌ڤ داهێنانه جهێ سه‌ربلندیێ یه بو هه‌ر تاكه كه‌سه‌كێ كوردستانى دخوازن كو نمونێن وه‌كو دكتورى ل وه‌ڵاتێ مە پتر په‌یداببن"
زێدەتر گوت "سه‌روكێ حوكمه‌تا هه‌رێمێ و سازیێن میرى هه‌لودانێن به‌رده‌وام دكه‌ن كو زه‌مینێ ل هه‌مبه‌ر داهێنه‌ر وخودان شیانانا خوشكه‌ن بو وێ یه‌كێ هه‌رێما كوردستانێ پێشبێخن وپتر مفاى ژ زانست وته‌كنولوجیا نوو و سه‌رده‌میانه وه‌رگرن و هه‌ولدانا دكه‌ین مفاى ژسه‌ربورا زانكوییێن روژئاڤا ببینین وسیسته‌مێ زانستى یێ پێشكه‌فتى ل ناڤا زانكویێن هه‌رێمێ ب چه‌سپینین كو پتر داهێنان بهێنه كرن"
ل دوماهیێ پارێزگارێ دهۆكێ خه‌لاته‌كێ رێزگرتنێ پێشكێشى د.ئازاد نه‌جار كر.
ژلایێ خوڤه د.ئازاد نجار سوپاسیا سه‌ركردایه‌تیا هه‌رێما كوردستانێ وپارێزگارێ دهۆكێ كر ل دور هه‌ولدانێن وان بو پێشئێخستنا سیسته‌مێ زانستى ل زانكویێن كوردستانێ و ته‌كه‌زكر كو ب كار ئینانا ته‌كنولوجیا نوو ودانانا به‌رنامێن ستراتیجى فاكته‌رێن سه‌ره‌كینه بو پێشئێخستنا هه‌ر بیاڤه‌كێ زانستى ل هه‌رێمێ وبه‌رهه‌ڤیا خو دیاركر بو پشته‌ڤانیكرنا هه‌موو چالاكیێن زانستى ل كوردستانێ تایبەتی چێكرنا سازییه‌كا تایبه‌ت بو كه‌سانێن داهێنه‌ر .
دهێتە زانین د.ئازاد نجار خه‌لكێ زاخویه ل وه‌لاتێ سوید دژیت وشیایه داهێنانه‌كا زانستى یا گرنگ به‌رهه‌ڤكه‌ت ئه‌و ژى چێكرنا دله‌كێ ده‌ستكرده كو دهێته چاڤه‌رێكرن رێكخراوا ساخله‌میا جیهانى ل سالا 2023ێ په‌سه‌ند بكه‌ت وخزمه‌تا نه‌خوشێن دلى پێ بهێته كرن.
بریارە هەر ئەڤرو نەجار سەرەدانا زانکۆیا ئەمریکی کوردستان ل دهۆکێ و زانکۆیا زاخۆ ژی بکەت، بو هایداربوون ژ نێزیک ل رەوشا پێشکەفتنا ئالیێ نوژاری و ساخلەمیێ.