بۆ ئێكه‌مین جار ل سنوورێ پارێزگه‌ها دهۆكێ سه‌نته‌رێ وێ یێ ژنان ل پارێزگه‌ها دهۆكێ خوله‌كا تایبه‌ت بۆ وان كچ و كوران سازكر كو بریارا هه‌ڤژینیێ دایى و هێشتا داوه‌تا خوه نه‌كریه، د خولێ دا چوار ته‌وه‌رێن سه‌ره‌كى بۆ شرۆڤه‌كرن كو ئه‌و ژى ساخله‌مى، یاسایى، ده‌روونى و جڤاكى بوون، داكو ل ئاینده چوو ئاریشیه بۆ دروست نه‌بن.
ئەڤرۆ ئێکشەمبی، 28ێ شوبات، د.دلڤین ئێحسان، رێڤه‌به‌را سه‌نته‌رێ وێ یێ ژنان ل پارێزگه‌ها دهۆكێ بۆ "وشە" گوت، ب مه‌ره‌ما خزمه‌تكرنا هه‌ڤژینان دوارێ ساخله‌مى، جڤاكى، ده‌روونى و یاسایى دا، ئه‌م وه‌كو سه‌نته‌رێ وێ یێ ژنان ل پارێزگه‌ها دهۆكێ رابووین ب ڤه‌كرنا خوله‌كا تایبه‌ت بۆ وان كچ و كورێن كو بریارا هه‌ڤژینیێ دایى و هاتینه مه‌هركرن ژى، به‌لێ نوكه ده‌زگردارن و هێشتا داوه‌تا خوه نه‌كریه كو ئێكه‌مجاره ل سنوورێ پارێزگه‌ها دهۆكێ ئه‌ڤ جورێ خولێ دهێته ڤه‌كرن".
زێده‌تر گۆت "ڤه‌كرنا ڤان جوره خولان گرنگیه‌كا زێده بۆ وان كچ و كوران هه‌یه كو به‌رى بچنه د قوناغا هه‌ڤژینیێ دا تشته‌كێ ژ هه‌ڤژینیێ بزانن داكو بشێن باشتر ره‌فتارێ ل گه‌ل هه‌ڤژینیێ بكه‌ن ب تایبه‌تى د وارێ ساخله‌مى و یاسایى و جڤاكى و ده‌روونى دا، ژبه‌ركو ئه‌ڤرۆ ئه‌ڤ چوار خاله بوینه ئه‌گه‌رێن سه‌ره‌كى یێن دروستبوونا ئاریشه و ناكوكیان دناڤبه‌را ژن و مێرا و جودابوونێ ژى، له‌وا گرنگه به‌رى كچ و كور هه‌ڤژینیێ پێكبینن ل سه‌ر وان چوار ته‌وه‌ران بهێنه هوشیاركرن داكو ل ئاینده چوو كێشه بۆ دروست نه‌بن".
رێڤه‌به‌را ناڤبرى دیاركر ژى كو مه‌ره‌ما وان ل خولێ ئه‌و نینه كو كچ و كورا ل هه‌ڤدو سار بكه‌ن و ژبریارا هه‌ڤژینیێ لێڤه‌بن، به‌لكو ئه‌وه داكو تووشى چوو كێشه و گرفتان نه‌بن و گۆت ژى "هه‌ر چه‌نده سه‌نته‌رێ مه ل سالا 2018ێ هاتیه دامه‌زراندن و د بورى دا خزمه‌ته‌كا به‌رچاڤ د وارێن جودا جودا كریه، به‌لێ دڤێ خولێ دا تنێ ده‌زگردار پشكدارى بوون، ئه‌ڤ خوله دێ به‌رده‌وام بن، نه‌ك تنێ ده‌زگردار به‌لكو خێزاندار ژى دشێن پشكداربن، ئومێدین ل ئاینده بشێن خولێن باشتر ژى بۆ ته‌خا گه‌نجان ڤه‌كه‌ین.
خول بۆ ده‌ما رۆژه‌كێ یا به‌رده‌وام بۆ و هژماره‌كا كێم یا كچ و كورێن ده‌زگردار پشكداربوون، به‌لێ ده‌ستپێكه‌كا گرنگه كو ل ئاینده كچ و كورێن زێده‌تر پشكداربن.