كۆمسیۆنی تەشكیلاتی حزبی دیموكراتی کوردستانی ئێران پەیامێكی ئاراستەی چەکدارە کوردەکانی سەر بە رژێمی ئێران کرد کە بە جاش ناسراون.
بەگوێرەی پەیامەکە کە لە ماڵپەڕی فەرمیی حزبەکە "
کوردستان میدیا" بڵاو کراوەتەوە داوا لە جاشەکان کراوە واز لە خەیانەت بە گەل و نیشتمانەكەیان بهێنن و سەنگەرەكانیان لە بەرەی داگیركەرەوە بگوازنەوە بۆ بەرەی گەل.
لەبەشێکی پەیامەکە باس لەوە کراوە کە دیاردەی چەكداركردنی تاكەكانی كورد لە لایەن دوژمنانەوە، یان چوونەپاڵ ئەم سیاسەتە بە هەر مەبەستێك بووبێت، زەبر و زیانێكی قورسی لە پەیكەری بزووتنەوەی سیاسی کورد داوە و دواجار ڕیزەكانی گەلی كوردی بەرەو پەرتەوازەیی و دوودەستەیی بردووە. بە ڕواڵەت، دوژمنان ئەم چەكدارانەیان پۆشتە و تێر و تەیار كردووە و بە گژ شۆڕشگێڕان و تێكۆشەرانی حزب و گەلیاندا كردوونەتەوە، بەڵام ناخی ئەم دیاردەیە، ڕاستییەكی تاڵ بیر دەهێنێتەوە کە لە چەند رووەوە جێی سەرنج و تێڕامانن.
یەکەم خاڵی جێگەی سەرنج کە لە پەیامەکەدا ئاماژەی پێکراوە ئەوەیە ئەو كەسانەی كە چەكیان بۆ دوژمن هەڵگرتووە، لە دژی نەتەوەكەیان وەستاونەتەوە و ڕاستەوخۆ خزمەت بە دوژمن دەكەن، واتای رشتنی خوێنی کورد بە دەستی کورد دەگەیەنێت و براوەی سەرەكیی ئەم كارەساتە، دوژمنە.
دووەم خاڵ ئەوەیە نانەوەی دووبەرەكی و ئاژاوە و چەند دەستەیی لە نێوان ڕیزەكانی گەلدا، دەبێتە هۆی ئەوەی کە دوژمن لەم ڕێگەیەوە، تۆوی بێ متمانەیی و تۆڵەكردنەوە لە نێوان تێكۆشەران و بەلاڕێداچوواندا بچێنێ و ئەگەر زیانێك هەبێت، لە پەیكەری بزووتنەوە و یەكڕیزیی گەلی کورد دەدات.
جگەلەمە سیاسەتی چەكداركردن و پەیوەستبوون بەم ڕەوتە، كەرامەت و پێگەی كۆمەڵایەتی و بنەماڵەیی ئەو كەسانە دەخاتە ژێر پرسیارەوە كە بە بێ هەستكردن بە بەرپرسیارێتی و تەنیا لە بەر ئیمكانات و هەندێك پلە و پۆست و شتی كاتی، ئامادەن خزمەت بە داگیركەران و دوژمنانی گەل بكەن. ئەمەش لە خۆیدا بووەتە هۆی دواكەوتن و خایاندنی ڕەوتی خەباتی مافخوازانە و سەرقاڵبوونی بە شەڕ و ململانێیەك كە دوژمن پیلانەكەی بۆ داڕشتووە.
لە کۆتایی پەیامەکەدا داوا لە جاشەکان کراوە ئەگەر ناتوانن هاوكاریی خەباتی نوێی ڕۆژهەڵات بكەن، بە لانی كەمەوە دژایەتیی هێزی پێشـمەرگە و خەباتی ڕەوای ڕۆلەكانی گەل نەكەن. هەروەها چەكدارانی كوردی سەر بە دەسەڵاتی ئاگادار کردووەتەوە لە گرنگی و هەستیاری ئەم قۆناغە نوێیەی خەبات تێبگەن و چەكەكانیان دابنێن و چیدی خزمەت بە دوژمن نەكەن.