چه‌ند رۆژێن بوری پارچه ڤیدیویه‌كا كچ و كوره‌كێن دهۆكێ ل تورێن جڤاكی به‌لاڤ بو ب تایبه‌تی تیكتوك و ئنستاگرامێ، ئه‌ڤه بویه ئه‌گه‌ر كو ئاریشه دناڤبه‌را هه‌ردوو مالباتێن وان دروست بیت، ده‌ما چه‌ند رۆژایه رێڤه‌به‌ریا نه‌هێلانا توندوتیژیا خێزانی ل پارێزگه‌ها دهۆكێ مژولێ چاره‌سه‌ركرنا ئاریشا وانن و ل دوماهیێ چاره‌سه‌ركر.
موقه‌ده‌م ئارام محه‌مه‌د، رێڤه‌به‌رێ نه‌هێلانا توندوتیژیا خێزانی ل پارێزگه‌ها دهۆكێ بۆ "وشه" گۆت، چه‌ند رۆژه پارچه‌كا ڤیدیویێ ژلایێ هه‌ڤاله‌كا كچه‌كێ ل تورێن جڤاكی به‌لاڤبو كو ئه‌و ل گه‌ل كوره‌كێ سه‌مایێ و هه‌مبێزێ دكه‌ن، پاشان ل تورێن جڤاكی ده‌نگڤه‌دا و ئاریشه دناڤبه‌را مالباتێن هه‌ردوو كچ و كورا دروست بوون.
زێده‌تر گۆت، ب مه‌ره‌ما پاراستنا وان هه‌ردوو كچ و كورا، رێڤه‌به‌ریا مه چویه ناڤا كه‌یسێ و شیان ب رێیێن قانونی هه‌ردوو مالباتان ب ئاخڤینن و رازی بكه‌ن ب چاره‌سه‌ركرنا وان هه‌ردوو كچ و كورا كو ئه‌و ژی هه‌ردوو كچ و كور ل هه‌ڤدو بهێنه مه‌هركرن و ببنه هه‌ڤژین.
ناڤبری دیاركر ژی كو پێدڤی یه كچ و كور زور ئاگه‌هدارێ خوه بن و باشتر ره‌فتارێ ل گه‌ل تورێن جڤاكی بكه‌ن و گۆت ژی، هه‌ر ئاریشه‌كا جڤاكی یا گرێدای خێزانی دروست بیت، به‌ری كو ئاریشه ژێ دروست بیت پێدڤی یه ل سه‌ر وان كه‌سان په‌یوه‌ندیێ ب مه بكه‌ن داكو ب شێوه‌یه‌كێ قانونی و نهێنی چاره‌سه‌ریا ئاریشا وان بكه‌ین.
ده‌ستپێكێ ڤیدیویا وان ل تیكتوكێ به‌لاڤبو، پاشان ل ئسنتاگرامێ و تورێن دی، هزراان جاران هاتنه شه‌یر و به‌لاڤكرن ڤه ژلایێ خه‌لكی و كارڤه‌دانێن خراپ ل سه‌ر هه‌ردوو مالباان كرن.