سه‌رۆكی هه‌رێمی كوردستان په‌یامێكی له‌باره‌ی ڕووداوه‌كانی دوێنێ و ئه‌مڕۆی شاری كه‌ركووك بڵاوكرده‌وه و ده‌ڵێ، هاووڵاتییان دڵنیا ده‌كه‌مه‌وه كه به ئیراده‌یه‌كی به‌هێز و به یه‌كڕیزی پێشمه‌رگه و جه‌ماوه‌ری دڵسۆز ڕووبه‌ری تیرۆریستان ده‌وه‌ستینه‌وه و هه‌وڵه‌كانیان تێكده‌شكێنین، ئاماژه به‌وه‌ش ده‌كات، كه جێگری سه‌رۆكی هه‌رێمی كوردستان و پارێزگاری كه‌ركووك و به‌رپرسانی سه‌ربازیم راسپاردووه و ته‌واوی ده‌سه‌ڵاتیان هه‌یه بۆ كۆنتڕۆڵكردنی دۆخه‌كه و پێداچوونه‌وه به پلانی ته‌ناهی شار.
بەناوی خودای بەخشندە و میهرەبان
سەبارەت بە پەلاماری ڕۆژی هەینی 21ـی 10ـی 2016 بۆ سەر شاری كەركووك سوپاسی خۆڕاگری و هاوكاریی دانیشتوانی خۆشەویستی شاری كەركووك و دەزگا ئەمنییەكان دەكەم و پرسە و سەرەخۆشیی خۆم بۆ كەسوكاری شەهیدانی پەلامارە تیرۆریستییەكە ڕادەگەیێنم و هیوای چاكبوونەوە بۆ برینداران دەخوازم.
ئەو پەلامارە هەوڵێكی بێهوودەی تیرۆریستانە بۆ قەرەبووی شكستەكانیان لەبەرانبەر پێشمەرگە لە بەرەكانی شەڕ. لەگەڵ ئەوەیش هاووڵاتیانی شاری كەركووك و هەموو گەلی كوردستان لەوە دڵنیا دەكەمەوە كە پشت بە خوای مەزن بە ئیرادەیەكی بەهێز و بە یەكڕیزیی پێشمەرگە و جەماوەری دڵسۆز ڕووبەڕووی تیرۆریستان دەوەستینەوە و هەوڵەكانیان تێكدەشكێنین.
هەر لە سەرەتای پەلامارەكەی ڕۆژی هەینی بە وردی بەدواداچوونم بۆ دۆخەكە كردووە و، بەڕێز جێگری سەرۆكی هەرێم و پارێزگای كەركووك و ژمارەیەك لە بەرپرسانی سەربازی و ئەمنیم ڕاسپاردووە كە بە پەلە كۆنتڕۆڵی دۆخەكە بكەن و ئەو بەڕێزانە دەستەڵاتی تەواویان هەیە كە ڕێوشوێنی پێویست بۆ پێداچوونەوە بە پلانی ئەمنیی شارەكە و سنووری پارێزگای كەركووك بگرنە بەر و، ئەویش لەپێناو پاراستنی كەركووك و هاووڵاتیانی سنووری ئەو پارێزگایە و ڕێگەگرتن لە پەلامار و دەستدرێژی تیرۆریستان و هەر ڕووداوێكی نەخوازراوە. بە هەر نرخێك بێت كەركووك پارێزراو دەبێت و ناكەوێتەوە دەستی دوژمنان.
مه‌سعوود بارزانی
سەرۆكی هەرێمی كوردستان
22ـی 10ـی 2016