دوای ئەوەی دوێنێ ئەنجوومەنی وەزیران بڕیاری دابەشكردنی مووچەی مانگی شوباتی ئەمساڵی مووچەخۆرانی دا، ئەمڕۆ وەزارەتی دارایی حكوومەتی هەرێم خشتەی مووچەی راگەیاند، كە لە ماوەی چەند رۆژێكی هەفتەی داهاتوو زۆرینەی وەزارەت و دەستەكان مووچە وەردەگرن، بەڵام خشتەكە مووچەی وەزارەتی پێشمەرگە و هێزە تەناهییەكانی تیادا نەبوو، وەزارەتی دارایی روونكردنەوەیەك پێوەست بە مووچەی ئەوان رادەگەیەنێت.
وەك لە روونكردنەوەكەدا هاتووە، سەبارەت بە مووچەی مانگی شوباتی هێزەكانی پێشمەرگە و دەزگە تەناهییەكان و هەموو ئەو شوێنانەی ناویان لە لیستی مووچەی 28ی ئەم مانگەدا نەهاتووە، هەموو لایەك دڵنیا دەكەینەوە كە لە نزیكترین كاتدا خشتەی مووچەكانیان بڵاو دەكەینەوە و لە هەفتەی داهاتوودا مووچەی مانگی شوباتی سەرجەم مووچەخۆران و فەرمانبەران دابەش دەكرێت.