لە شاری "پیرانشار"ی رۆژهەڵاتی كوردستان، بەهۆی هەڵكردنی رەشەبایەكی توندەوە، دیوارێك داڕما و ژن و مێردێك بوون بە قوربانی.
ئەمڕۆ سێشەم، یەكی تشرینی دووەم/نۆڤەمبەر ماڵپەڕی "پیرانشار" رای گەیاند، بەهۆی هەڵكردنی رەشەباوە لە پیرانشار، لە گوندی سیلوەی سەر بەو شارە، ژن و مێردێك لەكاتی گەڕانەوەیان بۆ ماڵەوە بەژێر دیوارێكی رۆیشتوون و لەو كاتەدا دیوارەكە رووخاوە.
زیاتر روونی دەكاتەوە، دیوارەكە بەسەر ئەو دوو هاوسەرەدا دەڕووخێت و بەهۆیەوە ژنەكە لەڕێوە گیانی لە دەست دەدات و پیاوەكەیش بە پەلە دەگەیەندرێتە نەخۆشخانە.
هاوكات لە ورمێ بەهۆی رەشەباوە، دیوارێك لە نزیك مزگەوتی لوتفعەلیخان رووخا و هاووڵاتییەك كە بەوێدا تەپەڕیوە، كەوتووەتە ژیر دیوارەكە و بە قورسی بریندار بووە.
پارێزگاری ورمی و بەڕێوەبەرانی بەرگریی شارستانی هۆشداری دەدەنە هاووڵاتییانی ئەو پارێزگایە، تا كەوتنی ئەو رەشەبایەی لە ئێوارەی سێشەم، 31ی تشرینی یەكەم/ئۆكتۆبەرەوە هەڵی كردووە، بەبن دیواری كۆن و ئەو خانووانەدا نەڕۆن كە لەژێر كاركردندان و داوایش دەكات تا بۆیان دەكرێت خەڵك لە ماڵەكانیان نەیەنە دەرەوە.
پیرانشار سنووری رۆژهەڵاتی كوردستان و باشووری كوردستانە و سەر بە پارێزگای ورمییە، لەڕووی زاراوەوە سەر بە ناوچەی موكریانە و بەپێی ئاماری فرەرمی كۆماری ئیسلامیی ئێران لە ساڵی 2011 ژمارەی دانیشتوانی نزیكەی 70 هەزار كەسە.
سەرچاوە/ پیرانشار نیوز- ئیرنا