ئەمڕۆ سێشەم مەسعوود بارزانی سەرۆكی هەرێمی كوردستان لەگەڵ فالح فەیاز ڕاوێژكاری ئاسایشی نیشتمانیی عێراق كۆبووەوە و لە كۆبوونەوەكەشدا هەڵمەتەكانی ڕزگاری مووسڵ و هەماهەنگی نێوان پێشمەرگە و سوپای عێراق و پێوەندییەكانی نێوان هەولێر و بەغدایان تاوتوێ كرد.
ماڵپەری سەرۆكایەتی هەرێم لەبارەی كۆبوونەوەكە بڵاوی كردووەتەوە كە لە كۆبوونەوەكەدا قۆناغەكانی هەڵمەتی ئازادكردنی مووسڵ و پێشڕەوی و سەركەوتنەكانی هێزی پێشمەرگەی كوردستان و هێزەكانی سوپای عێراق لە میحوەرەكانی باكوور و ڕۆژهەڵات و باشووری مووسڵ خرایە بەر باس و گفتوگۆ.
هاوكات جەخت لە هەماهەنگیی نێوان هێزی پێشمەرگە و هێزەكانی سوپای عێراق و پابەندبوونیان بە پیادەكردنی قۆناغەكانی پلانی هەڵمەتی ئازادكردنی مووسڵ كرایەوە.
بارزانی و فەیاز جگەلەوانە بیروڕایان لەبارەی پەیوەندییەكانی نێوان هەولێر و بەغدا و پڕۆسەی سیاسیی عێراق و دۆخی ناوچەكە ئاڵوگۆڕ كرد.
رامیار جەواد