لە ڕووداوێكی هاتوچۆدا دوو هاووڵاتی گیانیان لەدەست دا


لە ڕووداوێكی هاتوچۆ لە شارەدێییەكی سەر بە پارێزگای هەولێر دوو كەس گیانیان لەدەست دا و هاووڵاتییەكیش دەڵێت، تیژ لێخوڕین هۆكاری ئەو ڕووداوە بووە.

ئەمڕۆ شەموو 13ـی كانوونی دووەم، بەهۆی بەریەكەوتنی سێ‌ ئۆتۆمبێل لە ڕێگەی شارەدێی بێستانەی سەر بە شارۆكەی بنەسەڵاوەی هەولێر دوو كەس گیانی لە دەستدا و كەسێكیش بە سەختی بریندار بوو.

ئارام یاسین كە شایەتحاڵێكی ڕووداوەكەیە بە "وشە"ـی ڕاگەیاند، كەمێك پێش ئێستە لە ڕێگەی بێستانە دوو كەس گیانی لە دەستدا كە ڕووداوەكە روویدا لەنێوان تەكسیەكی جۆری سەنی و جێبیكی مۆدێل 2010 و گرایزەڕێك دوو لە سەرنشینانی تەكسیەكە گیانیان لەدەست داوە.

ئەو شایەتحاڵە گوتی، ئێستە هێزەكانی پۆلیسی فریاكەوتن و پۆلیسی هاتوچۆ لە شوێنی ڕووداوەكەن بە مەبەستی لێكۆڵینەوە لە ڕووداوی پێكدادانەكە و كردنەوەی ڕێگەكە، كە بەهۆی ڕووداوەكە و كەوتنی جەستەی كەسەكان و پاشماوەی ئۆتۆمبێلەكان لەسەر شەقامەكە بۆ ماوەی نیو سەعات ڕێگەكە داخرابوو.

هەرێمی كوردستان بە پێی ئامارێكی ساڵی 2017 زیاتر لە ملیۆنێك و 500 هەزار ئۆتۆمبێلی هەیە و زۆرترین ڕووداوەكانی هاتوچۆیش بەهۆی تیژ لێخوڕینەوە دەكەوێتەوە.



وشە - رامیار جەواد


PM:06:17:13/01/2018




ئه‌م بابه‌ته 727 جار خوێنراوه‌ته‌وه‌‌