"وشە" وردەكاری فڕێدانی نارنجۆكێك بۆ ماڵی بەرپرسێكی پێنجوێن ئاشكرا دەكات
لە رووداوێكی تەمومژاویدا و لەلایەن كەسانێكی نەناسراوەوە، نارنجۆكێكی دەستی فڕێ درایە، ماڵی لێپرسراوی بەشی بەڕێوەبەرێتی پۆلیسی شارۆكەی پێنجوێن و لایەنە پەیوەندیدارەكانیش هەوڵەكانیان بۆ دۆزینەوە و گرتنی ئەوانەی لەپشت رووداوەكەن دەست پێ كردووە.
ئەمڕۆ سێشەم 24ی نیسان/ ئەپریل، شەماڵ عەزیز وەك شایەتحاڵێكی ڕووداوەكە بە "وشە"ی ڕاگەیاند، ئەمڕۆ لەیەكێك لە گەڕەكەكانی ناو شارۆكەی پێنجوێن، لەلایەن كەسانێكی نەناسراوەوە، نارنجۆكێكی دەستی فڕێدرایە ماڵی لێپرسراوی پۆلیسی پێنجوێن و جگە لەزیانی مادی، هیچ زیانێكی گیانی لێ نەكەوتۆتەوە.
هاوكات لەراگەیاندراوێكی پۆلیسی پێنجوێن هاتووە، تەواوی هێزەكانی پۆلیس و ئاسایشی سنوورەكە، دەستیان بەئەنجامدانی گەڕان و لێكۆلێنەوە كردووە و تائێستەیش نەتوانراوە بكەرانی پشت ئەو كارە بگیرێن و لێكۆڵینەوەیش بەردەوامە.
بەپێی زانیارییەكانی "وشە" ئەنجامدەرانی رووداوەكە، لەكامێراكانی چاودێرییش دەركەوتوون، بەڵام لەكاتی رووداوەكەدا، چەتر بەكارهێنراوە و نەهێڵدراوە، لەكامێراكانی چاودێریدا رووخساری كەسەكان دەربكەوێت.
"وشە" چەندان جار پێوەندی بە بەرپرسانی ئیداری و تەناهیی سنووری پێنجوێن كرد، بەڵام بەشێكیان وەڵامی پێوەندیەكانیان نەدایەوە و بەشێكی تریشیان ئامادە نەبوون لەوبارەیەوە هیچ روونكردنەوەیەك بدەن.
شارۆكەی پێنجوێن، نزیكەی 98 كیلۆمەتر لەشاری سلێمانیەوە دوورە و ژمارەی دانیشتووانەكەی بەنزیكەی 50 هەزار كەس دادەنرێت و لەدوو شارەدێ و زیاتر لە 200 گوند پێكهاتووە.
پێنجوێن/ رێبین پێنجوێنی
وشە -
سهرخێڵ هاشم