خەڵكی شارەدێی وەحدەی باشووری ڕۆژهەڵاتی بەغدا، ڕێی سەرەكی نێوان بەغدا و شاری كووتیان گرت و هاتوچۆی لێ وەستێنرا، دوای ئەوەی خەڵكی ڕژانە سەر شەقامەكە و داوای باشكردنی خزمەتگوزارییە بنەڕەتییەكانی وەك ئاوەڕۆ و كارەبایان كرد.
پێگەی "
غەدپرێس" بڵاوی كردەوە، خۆپێشاندەرانی شارەدێی وەحدە تەنیا ئەمڕۆ خۆپێشاندان ناكەن، بەڵكو لەسەر ناڕەزایەتییەكانیان بەردەوام دەبن، تا خزمەتگوزاری تەواو بۆ ناوچەكەیان دابین دەكرێ، هەڕەشەی ئەوەیش دەكەن، بە یەكجاری شەقامی سەرەكی بەغدا-كووت دادەخەن، تا ئەو كاتەی خزمەتگوزارییەكانیان بۆ دابین دەكرێ.
كێشەی كەمئاوی و نەبوونی ئاوەڕ و زێراب، كارەبا و خزمەتگوزارییەكانی شەقام و ڕێگەوبان گەورەترین گرفتی خەڵكی شارەدێی وەحدەن و بەغدا لە دوای 2003ەوە هیچ پڕۆژەیەكی بۆ جێبەجێ نەكردوون، هەرچەندە ئەوان بەردەوام ناڕەزایییان دەربڕیوە، بەڵام كەس گوێی بۆ نەگرتوون.
بەگوێرەی داتاكانی ناوەند و ڕێكخراوە نێودەوڵەتییەكان، عێراق یەكێكە لە گەندەڵترین وڵاتانی دنیا و دزینی پارە بە پڕۆژەی وەهمی یەكێكە لە گرفتە گەورەكان و تەنیا لە كەرتی كارەبا بڕی زیاتر لە 50 ملیار دۆلار بەهەدەر دراوە، كەرتی تەندروستی و پەروەردە و خزمەتگوزارییە بنەڕەتییەكانی تریش بە هەزاران پڕۆژەیان بۆ كراوە، بەڵام تەنیا لەسەر كاغەز بوون و هیچیان جێبەجێ نەكراون.