لە ئەمەریکا سووکایەتی بە خێزانێکی مسوڵمان کرا

خێزانێکی مسوڵمان لەبەر ئەوەی بە ڕووخساری داپۆشراوەوە سەردانی نەخۆشخانەیەکی ئەمەریکایان کرد، لە دەرگاکەوە ڕێگە نەدرا بڕۆنە ژوورەوە و سووکایەتییان پێ کرا.

لە ویلایەتی ڤێرجینیای ئەمەریکا، خێزانێک بۆ سەردانی بووکەکەیان و نەوەکەیان ڕۆشتن، تا لە تەندروستییان دڵنیا ببنەوە و بەخێرهاتنیان بکەن، بەڵام هەر لە دەرگای دەرەوەی نەخۆشخانەکەوە ڕێگرییان لئ کرا و بە سووکایەتییەوە نەیانهێشت بڕۆنە ژوورەوە.

ئەم خێزانە کە لە ژن و مێردێک و کچەکەیان پێک هاتبوون، بەوە ڕێگرییان لێ کرا، کە گوایە کچەکە و دایکی ڕووپۆشیان کردووە، واتە "نیقاب"یان بەستووە، ئەم دیمەنەش بەلای دەرگاوانەکانەوە تۆقێنەر بوو، هەر بۆیە پێیان گوتن: نابێت بڕۆنە ژوورەوە بەو دیمەنە تۆقێنەرەوە کەس نایەوێت بتانبینێت، نە نەخۆش، نە پزیشک و پەرستارەکانیش.

ئەم خێزانە بە قسەی دەرگاوانەکان زۆر تووڕە بوون، هەر بۆیە سکاڵایان لەسەر تۆمار کردوون، لە لایەن ستافی نەخۆشخانەکەشەوە بە فەرمی داوای لێبوردن لەو خێزانە کرا، پێیان گوتوون: ئێوە و هەموو دانیشتوویەکی تری وڵاتەکە دەتوانن سەردانی نەخۆشخانەکە بکەن و بەوپەڕی ڕێزەوە پێشوازیتان لێ دەکرێت.