پێكهاتەكانی هەرێمی كوردستان دووپات دەكەنەوە مەسروور بارزانی سەرۆك وەزیرانی ڕاسپێردراو بۆ پێكهێنانی حكوومەتی داهاتووی كوردستان پارێزەرییان دەبێت و مافەكانیان بەتەواوی بۆ دابین دەكات.
دوێنی مەسروور بارزانی سەرۆك وەزیرانی ڕاسپێردراو بۆ پێكهێنانی حكوومەتی داهاتووی كوردستان سەردانی پێكهاتەكانی كرد و پشكی ئەوانی لە حكوومەتی داهاتووی كوردستان دیار كرد.
عیماد رەفعەت نوێنەری توركمانەكان لە ئەنجوومەنی پارێزگای هەولێر بە "وشە"ی ڕاگەیاند، مەسروور بارزانی لە قوتابخانەی سەرۆك بارزانییە و رۆڵێكی یەكجار كاریگەری دەبێت لەحكوومەتی نوێی هەرێمی كوردستان و دەتوانی هەموو مافەكانمان دابین بكات.
ڕوونیشی كردەوە كە مەسروور بارزانی كەسێكی بەتوانایە و ئێمەیش پشتگیری تەواوی دەكەین لە هەر كارێك بێت، چونكە ئەو بەردەوام پارێزەری پێكهاتەكانی كوردستان بووە.
لای خۆیەوە وەحیدە یاقۆ نوێنەری مەسیحییەكان بۆ "وشە" گوتی مەسروور بارزانی پشتگیری زیاترمان دەكات و ئومێدی زۆرمان پێی هەیە، بۆیە پێمان وایە كاری زۆر باش بۆ پێكەوەژیان دەكات.
هەولێر/ بڵند ئیبراهیم