یاسا حزبییه‌كان مانگانه‌ 160 ملیار دینار زیان به‌ حكوومه‌تی عێراق ده‌گه‌یه‌نن

:: AM:08:05:14/08/2019 ‌
له‌ دوای 2003 حزبه‌كانی شیعه‌ بۆ به‌رژه‌وه‌ندی خۆیان كۆمه‌ڵێك یاسایان ده‌ركردووه‌ و به‌ گوێره‌ی به‌دواداچوونێكش مانگانه‌ ئه‌و یاسایانه‌ 160 ملیار دینار له‌سه‌ر حكوومه‌تی به‌غدا ده‌كه‌وت و میلیشیاكانی حه‌شد و به‌رپرسانی حزبی سوودی لێ وه‌رده‌گرن، چونكه‌ به‌ گوێره‌ی ئه‌و یاسایانه‌ به‌ پله‌ی به‌رز خانه‌نشین كراون و مووچه‌یان پێ ده‌درێت.
یاساكان بریتین له‌ یاسای پاسپۆرتی دیپلۆماسی، یاسای قوربانیانی ڕژێمی پێشوو، خزمه‌تی جیهان،  یاسای دامه‌زراوه‌ی شوهه‌دا و یاسای به‌خشینی ده‌رماڵه‌تی تایبه‌ت به‌ ئه‌ندامانی حكوومه‌ت و په‌رله‌مان، یاسای قه‌ره‌بووكردنه‌وه‌ی ڕاپه‌ڕیوانی شه‌عبانییه‌ له‌ 1991.

به‌ گوێره‌ی به‌ دواداچوونی ڕۆژنامه‌ی "العربی الجدید" ژماره‌ی سوودمه‌ندان له‌و جۆره‌ یاسایانه‌ به‌ ڕوونی دیار نییه‌، به‌ڵام به‌رپرسێكی حكوومه‌تی عێراق دووپات له‌وه‌ ده‌كاته‌وه‌، كه‌ هه‌زاران كه‌س له‌ یاسایانه‌ سوودمه‌ندبوون و به‌شێكیشیان نه‌ك سوودمه‌ند بگره‌ زۆریش ده‌وڵه‌مه‌ند بوون.

سه‌رچاوه‌یه‌ك له‌ نووسینگه‌ی عادل عه‌بدولمه‌هدی ئاشكرای كرد، كه‌ مانگانه‌ حكوومه‌ت بڕی 160 ملیار دینار له‌ جێبه‌جێكردنی ئه‌و یاسایانه‌ و به‌خشینی مووچه‌ به‌و چینه‌ جیا جیایانه‌ ده‌به‌خشێت، سه‌رجه‌م ئه‌و یاسایانه‌یش له‌ ماوه‌ی 2005 تا 2017 ده‌ركراون و پێویسته‌ سنوورێكیان بۆ دیاریی بكرێ، به‌ڵام له‌به‌ر ئه‌وه‌ی پشتیوانی یاسایییان هه‌یه‌ حكوومه‌ت ناتوانێ هیچیان لێ بكات، جیا له‌ جێبه‌جێكردن، پێویسته‌ په‌رله‌مان ئه‌و دۆسیانه‌ بجولێنێت.


وشە - باز ئه‌حمه‌د

ئه‌م بابه‌ته 53 جار خوێنراوه‌ته‌وه‌‌