مەسروور بارزانی سەرۆكی حكوومەتی هەرێمی كوردستان، لە رێگەی ڤیدیۆ كۆنفرانسەوە سەرپەرشتیی یەكەمین كۆبوونەوەی لیژنەی باڵای جێبەجێكردنی یاسای چاكسازیی كرد، دوای ئەوەی پێڕەوی جێبەجێكردنی یاسای چاكسازیی لە كۆبوونەوەی ئەنجوومەنی وەزیران پەسەندكراو و لە ڕۆژنامەی وەقایعی كوردستانیش بڵاوكرایەوە.
بەگوێرەی راگەیەنراوێكی حكوومەتی هەرێمی كوردستان، گفتوگۆ دەربارەی میكانیزم و چوارچێوەی یاسایی جێبەجێكردنی یاسای چاكسازیی كرا.
مهسروور بارزانى: چاكسازى هەموو بوار و سێكتەرەكان دهگرێتەوە
سەرۆكی حكوومەت بە ناوی ئەنجوومەنی وەزیرانەوە دووپاتی لەوە كردووە، ئەنجامدانی چاكسازی بەشێكی گرنگی كارنامەی كابینەی نۆیەمی حكوومەتی هەرێمی كوردستانە و ئامانجیش لە جێبەجێكردنی یاسای چاكسازی، بەدیهێنانی دادپەروەریی و شایستەبوونە و دەبێ هەموو بوار و سێكتەرەكانیش بگرێتەوە، دابینكردنی ماف وئیمتیازاتی یاسایی مووچەخۆرانی ڕاستەقینە و شایستە ئامانجی سەرەكیمانە.
هەروەها لە راگەیەنراوەكەدا هاتووە، دوای ئەوەی وەزیرە پەیوەندیدارەكان راپۆرتی تایبەتیان سەبارەت بە جێبەجێكردنی یاسای چاكسازی خستەڕوو. لیژنەی باڵای جێبەجێكردنی یاسای چاكسازی راپۆرتی وەزارەتەكانی پەسەند كرد، و گشت وەزارەت و لایەنەكانی نەبەستراو بە وەزارەت ڕاسپێردران بە پێكهێنانی لیژنە لاوەكیەكان و دەستبەكاربوونیان لە زووترین كاتدا لە چوارچێوەی مادە و بڕگەكانی یاسای چاكسازیی.