سەرەتای ئەم هەفتەیە و لە دوایی هەینی مانگی رەمەزان، لە ئێران و وڵاتانی نزیك لێی لەلایەن میلیشیا و هێزە سیاسییەكانیان یادی رۆژی قودس، كە وەك درووشم و بۆنەیەكی بەرجەستەكردنی نەیاری بۆ ئیسرائیل لەلایەن ئیمام خومەینی، رابەری شۆرشی ئێران دانراوە و ساڵانەیش زیندوو دەكرێتەوە، بۆ ئەمساڵ تەنیا زیندووكردنەوەیەكی شێوەیی بوو، لەبەر چەندان هۆكار، لەوانە پەتای كۆرۆنا و ناڕەزایەتی خەڵك و لاوازیی بنەكەی جەماوەری ئەو حزبانەی نزیك لە ئێران و هیتریش، بە گشتی سستی زیندووكردنەوەی ئاماژەیەكی تری لاوازیی پێگەی ئێران بوو لە عێراق.
دەبێت زیندووكردنەوەی رۆژی قودس لە عێراق قەدەغە بكرێت، شتێكی بێمانایە و كار دەكاتە سەر ناوبانگی عێراق
ئینتفاز قەنبەر، سەرۆكی دامەزراوەی موستەقبەلی عێراقی بە "وشە"ی گوت، ئەوەی باسی كرا (رۆژی جیهانی قودس)، تەنیا هەوڵێكە بۆ چاولابردن لەسەر دۆخێكی خراپ بۆ بابەتێكی خەیاڵی هیچ پێوەندی بە دۆخەكەوە نییە، گەلانی ناوچەكە، بەتایبەتی هەردوو گەلی عێراق و ئێران، بەدەست چەندان كێشەی ئابووری و كۆمەڵایەتییەوە دەناڵێنن، بەتایبەتی عێراق لە سایەی بڵاوبوونەوەی ڤایرۆسی كۆرۆنا و دابەزینی نرخی نەوت، هەروەها بوونی چەندان میلیشیا كە هەڕەشە لە ئاسایشی هاووڵاتییان دەكەن و دەستدرێژیان دەكەنە سەر و سەتان و هەزارانیان كوشتوون.
زیاتر گوتی، لە سایەی ئەو هەموو كێشەی لە عێراق هەیە، بێین و ئەوانە لەبیرخۆمان ببینەوە و روو بكەینە ورووژاندنی بابەتی ئازادكردنی قودس، پێم وایە دروستكردنی هەر كێشەیەك لەگەڵ وڵاتانی ناوچەكە، لەبەرژەوەندی گەلی عێراق نییە، بەڵكو بەرژەوەندی عێراق لە هێوركردنەوەی دۆخەكە و چەسپاندنی ئاشتییە، ئەوەیش بۆ بنیاتنانەوەی وڵاتەكەمان و دەركردنی لەو تەنگژانەی هەن.
ئەو سیاسەتەوانە روونی كردەوە، دووژمنداریەتیكردنی ئیسرائیل پاساوی نییە، كردەنیش نییە و ئەنجامیشی نابێت، بۆیە دەبێت لەپێشچاومان بێت كە هەلێكمان لەپێشە بۆ ئاساییكردنەوەی پێوەندییەكانمان لەگەڵ ئیسرائیل و كاركردن بۆ دروستكردنی هاوپەیمانیەتییەك بۆ رووبەڕووبوونەوەی تیرۆر و چارەسەركردنی كێشەكانیتری وڵاتەكەمان، لەبری لەناوبردنی وزەكان بەو بابەتانە، ئێمە هاوكات دوژمنی گەلی فەڵەستین نین و هیوای سەركەوتنیان بۆ دەخوازین، بەڵام ناتوانین لەوان زیاتر فەڵەستینی بین.
"وەك سیاسەتوانێكی عێراق هانی پاڵپشتیكردنیان دەدەم، بۆ پەرەپێدانی وڵات و پێشكەوتنی كۆمەڵگەكەیان، نەوەك بۆ چەكداریكردنیان و هاندانیان بۆ تیرۆر، پێشم وایە ئاساییكردنەوەی پێوەندییەكان لەگەڵ ئیسرائیل، ئەركی فەلەستینییەكان سووك دەكات، نەوەك لە سایەی رێكخراوی تیرۆریستیدا بژین، كە سوود لە نەهامەتییەكانیان ببینن بۆ مەبەستی خراپ، وەك ئەوەی تاران لە ناوچەكە ئەنجامی دەدات، دەبێت زیندووكردنەوەی رۆژی قودس لە عێراق قەدەغە بكرێت، كە شتێكی بێمانایە و كار دەكاتە سەر ناوبانگی عێراق و دەیخاتە پێگەیەكی ناسەقامگیر لە ناوچەكە "، قەنبەر وای گوت.
هەینی رابردوو، كە دوایین هەینی مانگی رەمەزان بوو، لە ئێران و وڵاتانی ئێران تیایاندا باڵادەستە، وەك عێراق و لبنان و یەمەن، "رۆژی قودس"، زیندوو كرایەوە كە لە سەردەمی ئیمام خومەینی رابەری پێشووی ئێران هاتە دانان، لەو یادەدا ئێران دووپاتی باڵادەستی خۆی بەسەر ئەو وڵاتانە دەكاتەوە كە وێنەی رابەرانی شۆڕشی ئێران بەرز دەكرێتەوە و درووشمی دژ بە ئەمەریكا و ئیسرائیل دەگوترێتەوە، بەوەی نوێژ لە قودس دەكەن، بۆ ئەمساڵیش لە بەغدا چەندان وێنەی گەورەی ئەو رابەرانەی ئێران، جیا لە قاسم سلێمانی و ئەبو مەهدی موهەندیس، كە لە سەرەتای ئەمساڵەوە لەلایەن ئەمەریكا كوژران، بەرز كرایەوە.
خۆپێشاندەران، كە زۆرینەیەكی گەنجی شیعەی ناڕازین لە هێز و گرووپەكانی نزیك لە ئێران و بە هۆكاری ئەو نەهامەتی و گەندەڵی و خراپیی دۆخی خزمەتگوزارییەكان و ئابووریان دەزانن، ئەوان بوونەتە نەیاری هەموو لاگیری و دواكەوتنی سیاسەتواكانی ئێران و بە هی خۆیانی نازانن، كە لە دوای 2003 ئەوانەیە وایان كرد داهاتووی وڵات و ئەوان بگاتە نادیار و لە وڵاتێكی دەوڵەمەند بە نەوت، رێژەی هەژاری و بێكاری و هەڵاوسان و كورتهێنان، نیوەی زیاتری كۆمەڵگە و بودجەی وڵات بگرێتەوە.
تەنیا بۆ ئەوەیە خۆپان وا پێشان بدەن كە بەرگریكارن و جیهاد دەكەن
خەتاب تەمیمی، چالاكێكی خۆپێشاندانەكانی عێراق لە بەغدا بە "وشە"ی راگەیاند، ئەو رۆژە درۆیەكە و لە دوای 2003 ساڵانە ئێرانییەكان و میلیشیاكانی لە عێراق دەیكەن، ئەو درۆیەی لە حەفتاكانی سەتەی رابردوو هەیە، كاتێك مەلاكان لە ئێران بوونە فەرمانڕەوا، ئەگەر مەترسییەك بۆ سەر ناوچەكە هەبێت، لەلایەن ئێران و لایەنگرانیەتی زیاتر لە مەترسی ئیسرائیل، بۆیە ئەوان تەنیا درۆ دەكەن و خۆیان وا پێشان دەدەن بەرگری لە قودس و گەلی فەڵەستین دەكەن، كەچی ئەوانن عێراقی و یەمەنی و لبنانی و سووریایی دەكوژن و چوار پایەتەختی عەرەبی داگیر دەكەن.
ئەو چالاكە دووپاتی كردەوە، ئەوان دوو دەروازەی دیاریان لەپێشە بۆ گەیشتن بە قودس، باشووری لبنان و بەرزاییەكانی جۆلانی سووریاییە، بەڵام درۆ دەكەن، لە عێراق خەڵك دەكوژن و بانگەشەی ئەوە دەكەن قودس رزگار دەكەن، بە هەمان شێوە لە یەمەن و لبنان و سووریا، بۆیە ئەو درووشمە بەتاڵانە، تەنیا بۆ ئەوەیە خۆپان وا پێشان بدەن كە بەرگریكارن و جیهاد دەكەن، راستییەكەی ئەوان خراپەكار و درۆزنن، خۆیان و پاڵپشتیكارانیان لە ئێران.