گریمان كۆچت كرد و چانسی ئەوەت هەبوو كە دوای بڕینی چەندان وڵات گەیشتیتە جێی مەبەست. لەو كۆتاییەوە دەست پێ دەكەین، هیچ یەك لەو نیعمەتانەی خودا و حكوومەت پێی داوی، لەوێ دەستت ناكەوێت وەك ئەوەی بۆت وێنا كراوە. جارێ ئەگەر لە دەستی نادادپەوەری و نایەكسانی دەڕۆی، ئەوە نە لە هیچ شوێنێكی ئەم دنیایە ئەو یۆتۆپیایە دەدۆزیتەوە، نە تۆ مافی ئەوەت هەیە وەك ئەوان یەكسان بی. ئەگەر بۆ هەوای ئازاد دەڕۆی كە ئەمە بووەتە بنێشتەخۆشەی سەر زاری كۆچبەران، ئەوا قوربان تا زیاتر لە 10 ساڵ، ئینجا ئەگەر بوویتە خاوەن رەگەزنامە، ئەو هەلەت نابێت و دیسانەوە ناتوانی هەمان ئازادی ئێرەت لەوێ ئەدا بكەیت.
جێی باسە بپرسین ئاخۆ بارودۆخی ئازادی لێرە، ئەوا قڕانی تێكەوتووە! ئەی باش ئێمەمانان زیاتر لە 16 ساڵە لەو وڵاتە توێژینەوە دەكەین و سیمینار و كۆڕ و كۆبوونەوە دەكەین و دەنووسین، ئەی بۆ وای نابینین! كە بەداخەوە هەندێك جار ئەوەندە ئازادییەكە بەربەڕەڵاییە كە مرۆڤ قێز لەو ئازادییە دەكاتەوە. بۆ تۆ لە كوێی دنیا مافی ئەوەت هەیە بەناوی ئازادی قسەكردن و رادەربڕین، هەرچی پیرۆزی هەیە ناشیرینی بكەیت و راست و چەپ تۆمەت و جنێو ببەخشیتەوە و فەرمانگەی تاپۆ و كشتوكاڵ و داودەزگای حكوومی و حزبی بسووتێنی؟
ئێمە ناڵێین كۆچ قەدەغە بكرێت، باوەڕی تەواومان بە بنەماكانی لیبڕاڵیی و و گڵۆبالیزەیشن و پێشكەوتنی جیهانی هەیە و مرۆڤ ئازادە لە كوێ و چۆن ژیانێك هەڵدەبژێرێت، بەڵام وەك توێژەرێك و چاودێرێك و ئەزموونمان لەم بوارەدا، تكا لە گەنجان و خێزانەكانیان دەكەم كە خێرا بڕیار مەدەن و هەرچی چاندووتانە، بە چاونوقاندن و هەڵخەڵەتاندنێك مەیدۆڕێنن. ئەگەر بۆ كار دەچی بڕوات بێ، رێیەكی سەخت دەبڕی و دوای سێ قۆناغی ژیانی ناو كەمپ كە چەند ساڵی پێدەچێت، ئینجا تێكەڵی كۆمەڵگەكەی خۆیانتان دەكەن و لەوێدا تۆ لە خەوێكی قووڵ بەخەبەر دێیت، كە ئەوێ نە بەكەڵكی ژیان و نە بەكەڵكی ئەداكردنی ئازادی دێت و نە ئەو بەهەشتەیە وێنا كرابوو.
ئەگەر چانسی ئەوەت هەبوو هەموو ئەو قۆناغانە ببڕی، ئینجا دەبێت لە شەشی بەیانییەوە وەك كۆیلە كار بكەیت لە شوێنێك تا پێنجی ئێوارە، ئینجا بەم شەكەتییە دێیتەوە و نانێكی سارد دەخۆیت و لە شوێنێكی تەسك و تاریكی غوربەت دوور لە خاك و دۆست و یادگاری دادەمێنی و گوێ لە گۆرانیی "هەموو شەوێ كۆتری دڵم باڵدەگرێت و بەرەو لای ئێوە دەفڕێ ..." دەگریت. ئیتر قەت رۆحت ئۆقرە ناگرێ. دواتر هەندێك لە كوردەكان هەر بەوەش ناوەستن و كە پێنجی ئێوارە گەیشتنەوە، لە شەش بۆ 12ی شەویش خەریكی دلیڤەری پیتزا و كاری تر دەبن، كەواتە تۆ هەموو رۆژ و شەوەكەت لەكار دەبەیتە سەر و بەم كارەش نە دەبیتە پیاوی كار و بازرگانی گەورە و نە دەحەسێیتەوە. بەو ئازادییەی ئێرە دەرفەت هەیە بگەیتە شوێنێك، بەڵام دوای دەیان ساڵ لەو ئازادییەی ئەوێ ناگەیتە هیچ.
ئازادی و كار دوو مافی بنەڕەتی مرۆڤن
ئازادی و كار دوو مافی بنەڕەتی مرۆڤن و تاك ئازادە چۆن هەڵیاندەبژێرێ و چۆن ئەدایان دەكات. هەردووكیان لە هەرێمی كوردستان بەرجەستەن. ئەو كارەی ئەوێ كە باسمان كرد، ئەگەر هەمان كار لێرە بكەیت، لە شەشی بەیانی تا 12ی شەو، بێمانایە كە بگوترێ هیچت دەست ناكەوێت یان كار نییە. بۆچی كار بۆ كوردانی رۆژهەڵات، رۆژئاوا، باكور و خەڵكی ناوەڕاست و باشووری عێراق و خەڵكی بیانی هەیە، بۆچی بۆ گەنجانی ئێمە بەرجەستە نییە؟ لێرەدا نابێ چاوپۆشی لە ئەدای خراپی حكوومەت و كۆمپانیاكان بكرێت كە ئەولەوییەت بە دەستی كاری خۆمان نادەن، بەڵام لە هەمان كاتیشدا گەنجی خۆمان هەموو كارێك ناكات لێرە، بەڵام پێی ئاساییە كە لە ئەوڕوپا هەموو كارێك بكات!.
خاڵێكی تری گرنگ ئەوەیە كە تۆ وەك هاووڵاتی لێرە كارێكی شەرەفمەندانەتر دەكەیت. كارێك كە بۆ بنیاتی نیشتمان و نەتەوەكەت بێ و وەك ئەركێكیش بۆ نەوەكانی داهاتوومان بێت، چۆن بەراورد دەكرێت بە كارێك بۆ بەرهەمی بێگانە كە تاك وەك كاڵا بۆ قازانجی خۆی و نەتەوەكەی بەكار دێنێ. لەلایەكی تریشەوە، هەموومان بەئازادی دەتوانین قسە بكەین و فشار دروست بكەین و خۆمان بپاڵێوین و دەنگ بدەین و بژین، كەوایە بۆچی بەدوای كار و ئازادی وەهمی رابكەین و ژیانی خۆمان سەخڵەت بكەین. با ئارام بگرین و قەناعەتمان بە بەشەكانی خۆمان هەبێت و لێرە لە ژیانێكی ئارام و ئاسوودە بژین.