لەسەر هێنانە خوارەوە ئاڵای یاحوسێن..كۆمپانیایەكی توركی لە كارەكەی دوور خرایەوە
ئێوارەی دوێنێ شەموو لەسەر هێنانە خوارەوە ئاڵایەكی ڕەش كە لەسەری نووسرابوو "یا حوسێن" كۆمپانیایەكی توركی و كارمەندەكانی لە شارۆكەی بەدرەی سەر بە پارێزگای واست دوور خرانەوە و كارمەندەكانیشیان بەزۆر دەركران.

شارۆكەی بەدرە دەكەوێتە باكوری پارێزگای واست و هاوسنوورە لەگەڵ كۆماری ئیسلامیی ئێران و لە ڕووی مێژوویییەوە یەكێكن لە ناوچە كوردستانییەكانی دەرەوەی كارگێڕیی هەرێمی كوردستان و دانیشتووانی لە كوردانی فەیلی پێك هاتوون.

ئێوارەی دوێنێ بەهۆی ئەوەی كۆمپانیایەكی توركی ئاڵایەكی ڕەشی شیعەكانی لە شوێنی كارەكەی هێناوەتە خوارەوە، بۆ ئەوەی ناكۆكی مەزەوی لە نێو كارمەندەكانی كۆمپانیاكە دروست نەبێ، لەلایەن میلیشیا شیعەكانەوە هێرشی كراوەتە سەر كۆمپانیاكە و بەتوندی سەركۆنە كراون.

بەگوێرەی ئەو زانیارییانەی لە ناوچەكەوە دەست "وشە" كەوتوون، میلیشیاكان و هێزە تەناهییەكان بە زۆر دەرگەی كۆمپانیاكەیان بە بەڕێوەبەر و خاوەنكارانی كۆمپانیاكە داخستووە و سەرجەم ئەو كەسانەش كە هەڵگری رەگەزنامەی توركیا بوون وێڕای سووكایەتی پێكردنیان لە شارەكە دەریان كردوون و ئاگەداریان كردوونەتەوە كە خاكی عێراق بەزووترین كات بەجێ بهێڵن، دەنا ڕووبەڕووی مەرگیان دەكەنەوە.

زانیارییەكان هێما بۆ ئەوەش دەكەن، كە میلیشیاكان دەستیان بەسەر كەلوپەل و ئامێرەكانی كۆمپانیاكەدا گرتووە و زیانی زۆر گەورەی مادییان بەر كۆمپانیاكە گەیاندووە.

وشە/باز ئەحمەد.


AM:11:58:09/10/2016




ئه‌م بابه‌ته 3635 جار خوێنراوه‌ته‌وه‌‌

زیاتر ...