سەرۆكی ئەمەریكا، دوای داخستنی وەزارەتی پەروەردە، دەستی بۆ وەزارەتی تەندروستی برد و لە هەنگاوی یەكەمیشدا 10 هەزار كارمەندی دەركرد.
ئەمڕۆ سێشەم، یەكی نیسان، ڕۆبێرت كینیدی جۆنیۆر، وەزیری تەندروستیی ئەمەریكا، پلانی ڕێكخستنەوەی وەزارەتی تەندروستی و خزمەتگوزاریی مرۆڤیی وڵاتەكەی ئاشكرا كرد كە دەبێت لە داهاتوودا باشتر ئاگای لە بڵاوبوونەوەی هەر پەتایەكی گشتی بێت وەك كۆڕۆنا و زۆر بابەتی تری پەیوەست بە تەندروستییەوە.
لەمیانەی پلانە نوێیەكەدا، چەندان ملیار دۆلار لە بابەتی ئالوودەبوون بە مادەی هۆشبەر و كردنەوەی سەنتەری تەندروستی لە تەواوی وڵاتدا بۆ ئەو بابەتە خەرج دەكرێت.
لایەنێكی تری گۆڕانكارییەكان، كەمكردنەوەی كارمەندانی تەندروستییە و لە هەنگاوی یەكەمیشدا 10 هەزار كارمەند خانەنشین كراون كە خۆی پلانەكە بۆ خانەنشینكردنی 62 هەزار كارمەندە بە چەند قۆناغێك كە ئەمەش دەكاتە چواریەكی تەواوی كارمەندانی ئەو كەرتە.