تا ئێستە بەغدا لەسەر دەست پێكردنەوەی هەناردنی نەوتی هەرێمی كوردستان رژد نییە، لە لایەك وەك وەڵامدانەوەی گوشارەكانی ئەمەریكا ئامادەیی بۆ دەست پێكردنەوەی هەناردن رادەگەیەنێت، كۆبوونەوە بۆ گفتوگۆكردن لەگەڵ كۆمپانیاكان و هەرێمی كوردستان دیاری دەكات، كەچی لە لایەكی تر مەرج دیاری دەكات و بەربەست بۆ بابەتەكە دروست دەكات.
زیاتر لە مانگێك بەسەر رێككەوتنی هەردوو حكوومەتی فیدراڵی و هەرێمی كوردستان لەسەر دەست پێكردنەوەی هەناردنی نەوتی هەرێم تێپەڕیوە، كەچی تا ئێستە نەوتەكە ناڕوات، چەند كۆبوونەوەیەك لە بەغدا كراوە و بڕیارە لە هەولێریش بكرێت، هەردوو وەزارەتی نەوتی عێراق و سامانە سروشتییەكانی هەرێم و كۆمپانیاكانی بەرهەمهێنەری نەوتی لە هەرێم كار دەكەن كۆ دەكاتەوە و تاوتوێی كێشەكان دەكەن.
لەوكاتەی كۆمپانیاكانی نەوت دەڵێن وەزارەتی نەوتی عێراق خواستی نییە گفتوگۆ لەبارەی گرێبەستەكانیان لەگەڵ هەرێم بكات و دەیەوێ تاكلایەنە ئەو گرێبەستانە دەستكاری بكات،
گۆڤەند شێروانی شارەزای بواری نەوت پێی وایە دوایین بەربەست لەبەردەم دەست پێكردنەوەی هەناردنی نەوتی هەرێم داواكاریی كۆمپانیاكانە.
زیاتر گوتی، ئەو كۆمپانیایانە چەند داواكارییەكیان بۆ دەست پێكردنەوەی بەرهەمهێنانی نەوت و هەناردنی هەیە، لەوانە دەستكارینەكردنی گرێبەستەكانیان لەگەڵ وەزارەتی سامانە سروشتییەكانی هەرێم و روونكردنەوەی میكانیزمی پێدانی كرێی بەرهەمهێنانی نەوت و دانەوەی قەرزەكانیان كە بڕەكەی نزیكەی ملیارێك دۆلارە، بۆیە ئێستە بابەتەكە لەو داواكارییانە گیری خواردووە، كاتێك وەزارەتی نەوتی عێراق ئەو داواكارییانەی كۆمپانیاكان رەت دەكاتەوە و بڕیارە كۆبوونەوەی تریان لەسەر بكرێت.
شایەنی باسە هەناردنی نەوتی هەرێمی كوردستان لە رێگەی بەندەری جەیهانی توركیا لە ئاداری 2023 بە بڕیاری دادگای ناوبژیوانیی پاریس لەسەر داوای عێر اق وەستا، بەپێی شارەزایان زیانی وەستانی نەوتی هەرێمی كوردستان بۆ عێراق 20 ملیار دۆلار زیاتر دەكەوێت، لە 25ی شوباتی رابردوو وەزیری دەرەوەی ئەمەریكا لە میانی پێوەندییەكی تەلەفۆنی لەگەڵ سەرۆك وەزیرانی عێراق دووپاتی لە پێویستیی بەگەڕخستنەوەی بۆری نەوتی عێراق توركیای كرد، جیا لە پابەندی بە گرێبەستەكانی كۆمپانیا نەوتییە ئەمەریكییەكانی لە عێراق و هەرێم كار دەكەن.