ماوەی 10 ساڵە بەغدا بەردەوام ستەم لە كوردستان دەكات و ئامانجی توندكردن و لەقاڵبدانی هەرێمی كوردستانە، بە هەمان شێوەی دەسەڵاتەكانی رابردووی بەغدا كە بەردەوام دژایەتیی هەرێمی كوردستان و كوردیان دەكرد و ستەمیان لە خەڵكی كوردستان دەكرد، ئێستەش ستەمەكان دووبارە دەكەنەوە.
ئێستە كورد گەیشتووەتە بڕوایەك كە دەتوانێت بە كشانەوەی كێشە بۆ ئیدارەی دەوڵەتی عێراق و حكوومەتەكەی دروست بكات، ئەوەش وەك هەڵوێستێك لە بەرانبەر ئەو ستەمەی كە دەكرێت، لە نەناردن و نەدانی مووچەی فەرمانبەرانی هەرێمی كوردستان، لە كۆبوونەوەی حكوومەتیش باس لەو ئەگەرە كراوە.
رەسووڵ رەئووف ئەندامی مەكتەبی سیاسیی حزبی سۆسیال دیموكراتی كوردستان بە "وشە"ی راگەیاند، لەدوای 2003 كورد بەردەوام دەیتوانی لە بەغدا گوشار دروست بكات بۆ ئەوەی داواكارییەكانی بسەپێنێت، لەوانە جێبەجێكردنی مادەی 140 و چەندین بابەتی تر، ئەوكات ئەگەر هەرێم بكشایەتەوە زۆر كاریگەر دەبوو، بەڵام لەم كاتەشدا ئەگەر كورد بكشێتەوە، عێراق فیدراڵییە و كشانەوەی كورد كێشە دروست دەكات، چونكە بەپێی یاسایی نێودەوڵەتی ناكرێت هەرێمێك لە حكوومەتی عێراق بەشدار نەبێت.
روونی كردەوە، پێكهێنەرەكانی حكوومەتی هەرێم دوو لایەنن و پێویستە هاوهەڵوێست بن و كاری پێكەوەیی بكەن، ئێستە دۆخی رۆژهەڵاتی ناوەڕاست لە گۆڕاندایە و چاوی هاوپەیمانان لەسەر سووریای نوێیە، رەنگە لە داهاتوو سرەی عێراق بێت، سەرۆك كۆمار لە بەغدا كوردە هیچ دەسەڵاتی بەكارنەهێناوە بۆ چارەسەری كێشەكان، جێگری سەرۆكی پەرلەمان و وەزیرەكان هیچ دەسەڵاتییان نییە، لەوكاتەی پێكهێنەری سەرەكیی حكوومەتی عێراق كوردە، كە چەندین پۆستی گرنگیان لە دەستە.
لای خۆیەوە سەرباز خۆشناو ئەندامی مەكتەبی سیاسیی بزووتنەوەی پێوەندیی ئیسلامیی كوردستان، بە "وشە"ی گوت، دەسەڵاتە یەك لەدوا یەكەكانی بەغدا هەمیشە دژی كوردستان بوون، ئەوان بەهەموو شێوەیەك دژی كورد وەستاونەتەوە، هەرێمی كوردستان لە دەستووردا سەربەخۆیە لە دەسەڵاتەكاندا، ئەوان لە رابردوودا خەڵكی كوردستانیان بەهەموو شێوەیەك سزادەدا و ئازاریان دەدات و ئەنفالیان دەكرد.
روونی كردەوە، ئەوان دژی كورد بوون، ئەو بڕیارەیان دابوو و خۆیان یەكلا كردبووەوە، دەسەڵاتی ئێستەش بە هەمان شێوە دژی كورد و كوردستانە، بەڵام بە جۆرێكی تر دژایەتی دەكات، ئەویش بەكارهێنانی مووچەیە، راستییەكەی بەغدا ئەو بەغدایە نییە كە خەڵك پێیان وایە خەمخۆر و دڵسۆزی خەڵكی كوردستانە، سەركردایەتیی كوردستانیش ئەوە دەزانێت كە بەغدا ئامانجێكی هەیە ئەویش ئەوەیە هەرێمی كوردستان لاواز بكات و پێگەی لاواز بكات و بەغدا بەم جۆرە دەڕوانێتە هەرێمی كوردستان.
ئەو ئەندامی مەكتەبی سیاسیی بزووتنەوەی پێوەندیی ئیسلامیی دووپاتی كردەوە، ئەوەی بەغدا لە مووچە بۆ خەڵكی عێراقی دەكات، هیچ كات ئامادە نییە بۆ هەرێمی بكات، هەرێمی كوردستان لە رووی پێشكەوتن و پڕۆژەوە چەند هێندەی عێراق باشترە و كاری كردووە، بابەتێكی تریش ئەوەیە كاتی ئەوە هاتووە ئەو هێز و لایەنە سیاسییانەی هەرێم واز لە ململانێ و ركابەرایەتی یەك بێنن و كۆتایی بەو دۆخە ناوخۆییە بێنن، بەرانبەر بەغدا یەك دەنگ بن و دژی یەكتر پەنا بۆ دادگای فیدراڵی نەبەن.
"هەرێمی كوردستان ناكرێت دەستەوەستان بێت و چاوەڕێی ئەو ستەمەی بەغدا بكات و بەغداش بەردەوام بێت لەو ستەمە، ئەمە بڕیاری گرنگی دەوێت و دوو حزبی دەسەڵاتدار دەتوانن لە بەرژەوەندی خەڵك لەو بارەوە بڕیاری گرنگ بدەن، هەرچی زووە هێزەكان یەكبگرن و كابینەی دەیەم پێك بێت، ئەگەر یەك نەبین بەغدا كاری زیاتر دژی هەرێم و كورد دەكات، بڕیار وایە هەفتەی داهاتوو فراكسیۆن و وەزیرەكان و ئەوانەی پۆستیان هەیە لەگەڵ حكوومەتی هەرێم كۆببنەوە و پێكەوە بڕیارێك بدەن، رێگە نەدەن بەغدا بەو جۆرە بۆ مووچە لەگەڵ هەرێم مامەڵە بكات، لەم كاتەدا كورد بە یەك دەنگ دەتوانێت بڕیاری گرنگ بدات، ئەوكات بەغدا ناچارە دێتە پێشەوە، ئەوەی ئێستە دەیكات كوشتنێكی لەسەر خۆیە"، سەرباز خۆشناو ئەندامی مەكتەبی سیاسیی بزووتنەوەی پێوەندیی ئیسلامی وا دەڵێت.
وشە/ وشیار عەلی