شارەكانی هەرێمی كوردستان بەهۆی زۆریی ئۆتۆمبێلەوە تەواو قەرەباڵغ بوون و بەرپرسێكیش دەڵێت: بەزووترین كات دەبێت چارەسەری كێشەی گواستنەوە بكرێت.
قایمقامی سلێمانی رای گەیاند، "پێویستە حكوومەت بە رژدی كار بۆ چارەسەركردنی كێشەكانی گواستنەوەی گشتی بكات."
بەهۆی باشبوونی دۆخی ئابووری لە هەرێمی كوردستان، لە زۆرینەی شارەكانی كوردستان جگە لە سلێمانی، هێڵی گشتی پەكی كەوتووە و زۆرینەی هاووڵاتییان بە ئۆتۆمبێلی خۆیان هاتوچۆ دەكەن و ئەمەش وایكردووە شەقامەكان بەردەوام جمەیان بێت.
لە كۆی هەزار و 600 پاس كە لە هێڵەكانی ناو شاری سلێمانیدا كار دەكەن، بەهۆی كەمی نەفەرەوە بەردەوام پاسەكان كەم دەبنەوە، لە هەولێریش هێڵی پاس لە زۆرینەی شەقامە دیارەكان نەماوە.
ئاوات محەمەد قایمقامی سلێمانی، لە چاوپێكەوتنێكدا رای گەیاند، گواستنەوەی گشتی یەكێكە لە گرفتە سەرەكییەكانی سەرجەم شارەكانی هەرێمی كوردستان و عێراقیش، چونكە هۆیەكانی گواستنەوە لاوازن.
باسی لەوەش كرد، نەبوونی گواستنەوەی گشتی خەڵك ناچار دەكات بە ئۆتۆمبێلی خۆیان هاتوچۆ بكەن، بۆ ئەوەیش قەرەباڵغی لە شەقامەكاندا دروست دەبێت بەتایبەت لە بازاڕ و شوێنە گشتییەكان.
قایمقامی سلێمانی ئەوەشی گوت، پێویستە حكوومەتی داهاتووی هەرێمی كوردستان بە رژدی لە ڕێگەی وەزارەتی گواستنەوەوە، كار بۆ چارەسەری كێشەكانی گواستنەوەی گشتی بكات.