ئه‌نیمه‌یشنی ''له سێبه‌ری سه‌روو'' له ده‌رهێنانی هه‌ردوو ده‌رهێنه‌ر شیرین سۆهانی و حوسێن مه‌لایمی، توانی ببێته براوه‌ی خه‌ڵاتی ئۆسكار كه شه‌وی رابردوو به‌ڕێوه‌چوو. ئه‌نیمه‌یشنه‌كه 20 خوله‌كه و له 97ه‌مین فێستیڤاڵی ئۆسكار خه‌ڵاتی باشترین كورته ئه‌نیمه‌یشنی به‌ده‌ست هێنا.
شیرین سۆهانی و حوسێن مه‌لایمی هاوسه‌ری یه‌كتر و خه‌ڵكی تارانن و هه‌ر له تاران ده‌ژین، له به‌شی ده‌رهێناندا بڕوانامه‌ی ماسته‌ریان له زانكۆی هونه‌ری تاران وه‌رگرتووه.
سێ ئه‌نیمه‌یشنی تر له‌و فێستیڤاڵه ركابه‌ری ئه‌نیمه‌یشنه ئێرانییه‌كه بوون، به‌ڵام نه‌یانتوانی سه‌ركه‌وتوو بن.
ئه‌و دوو ده‌رهێنه‌ره تا رۆژێك به‌ر له فێستیڤاڵی سینه‌مایی ئۆسكار، ڤیزه‌ی گه‌شتكردن بۆ ئه‌مه‌ریكایان بۆ نه‌گه‌ڕابووه‌وه و دواتر به خێرایی توانیان له رێوڕه‌سمه‌كه ئاماده ببن.
مه‌لایمی قسه‌ی بۆ میوانانی فێستیڤاڵه‌كه كرد و گوتی، ئه‌وه‌ی رووی داوه بۆ من وه‌ك په‌رچوو "مه‌عجیزه" وایه، به‌ڵام ئه‌گه‌ر ئیراده‌مان هه‌بێت و وه‌فادار بین په‌رچووه‌كانیش روو ده‌ده‌ن.
ئه‌نیمه‌یشنه‌كه پێشتر له فێستیڤاڵه‌كانی ڤێنیزیا، ترابیكا و لۆس ئه‌نجیلۆس به‌شداریی كردووه و بۆ فێستیڤاڵی Annie Awards و ئانسی پاڵێوراوه.
ده‌رهێنه‌ره‌كانی ئه‌و ئه‌نیمه‌یشنه گوتیان، شه‌ش ساڵ و نیو به‌و كورته فیلمه خه‌ریك بوون و خۆیان بودجه‌ی فیلمه‌كه‌یان دابین كردووه.
فیلمه‌كه هیچ گفتوگۆیه‌كی تێدا نییه، باس له كاپتنی كه‌شتییه‌ك ده‌كات كه تووشی دڵه‌ڕاوكێ و خه‌مۆكیی دوای جه‌نگ بووه، له‌گه‌ڵ كچه‌كه‌ی له خانوویه‌كی بچووك له ناوچه‌یه‌كی په‌راوێزخراوی كه‌نداو ده‌ژین. باوك و كچ ده‌بێت رووبه‌ڕووی ته‌نگژه‌كانی ژیان ببنه‌وه.
پێویسته بگوترێ له‌م فێستیڤاڵه‌دا ئه‌نیمه‌یشنی FLOW بووه براوه‌ی ئه‌نیمه‌یشنی درێژ.