ب مەرەما خزمەتکرنا کەرتێ ساخلەمیێ، حوکمەتا هەرێما کوردستانێ دێ 40 کارمەندان ل کەرتێ ساخلەمیێ ل قەزا بەردەڕەش دامەزرینیت، دیسان ل ئاکرێ ژی دێ قەستەرا دلی هێتە چێکرن، ل نێزیک دێ 250 کارمەند بو تەنگاڤیا دهۆکێ ژی هێنە دامەزراندن.
د. سەباح زێباری، سەرۆکێ لژنا ساخلەمیێ ل پەرلەمانێ کوردستانێ دیارکر کو کەرتێ ساخلەمیێ ل هەردو دەڤەرێن ئاکرێ و بەردەڕەش بەر ب پێشڤەچونێ یە و بۆ "وشە" گوت، ب مەرەما پتر خزمەتکرنا کەرتێ ساخلەمیێ ل دەڤەرا ئاکرێ و بەردەڕەش دێ سەنتەرێ قەستەرا دلی ل ئاکرێ هێتە چێکرن ل گەل دابینکرنا کەلوپەلێن پێدڤی بۆ سەنتەری.
زێدەتر گوت، رەزامەندیێن دەستپێکێ بو دامەزراندنا 40 کارمەندان بو کەرتێ ساخلەمیا بەردەڕەش ژی هاتیەکرن، ئەم وەکو لژنا ساخلەمیێ ل پەرلەمانی دخوازین کو ئەولەویەت بو وان کەسان بیت کو ئەڤە چەند سالە ب خوبەخش دناڤ کارتێ ساخلەمیێ دا خزمەتێ دکەن، هەردیسان کار هێتەکرن کو نێزیکێ 250 کارمەندان بو نەخوشخانا تەنگاڤیا یا نوو ل دهۆکێ ژی بهێنە دامەزراندن، چونکی تەنگاڤیا نوو یا دهۆکێ پێدڤی ب ستافی یە.
ناڤبری دیارکر ژی کو بهەڤکاریا هەردوو رێڤەبەرێن گشتی یێن ساخلەمیا پارێزگەها دهۆکێ. د. نزار عسمەت و د. ئەڤراسیاب موسا کار و خزمەتێن باش بو کەرتێ ساخلەمیێ ل دەڤەرا ئاکرێ و بەردەڕەش د چارچوڤێ کابینا نەهێ دا هاتینەکرن وگوت ژی، پێشتر ژی تیشکا سیتی سکان و تیشکا MRI ل ئاکرێ هاتینە چێکرن، دیسان بوردێ ئەکادیمی پزیشکی کوردستانی ل نەخوشخانا گولان و سەنتەرێ تەلاسیمیا و بانکا خوینێ ل ئاکرێ هاتینە ڤەکرن، ئاڤاکرنا نەخوشخانا تەنگاڤیان ل قەزا بەردەرەش و ئاڤاکرنا بنگەهێ ساخلەمیێ ژ جورێ A ل ناحیا دینارتێ چونە دوارێ بجهئینانێ دا و هاتینە چێکرن، هەردیسان ڤەکرنا تاقیگەها کورونایێ ل ئاکرێ وبەردەرەش ئەو ژی ئێک بوو ژ وان خزمەتێن بو هەردوو دەڤەرا هاتینەکرن، ل ڤێرە سوپاسیا مەسروور بارزانی، سەروکی حکومەتا کوردستانێ و وەزیرێ ساخلەمیا حکومەتا هەریمێ دکەین ژبەرکو بەردەوام لدویڤ داخوازیێن خەلکێ دەڤەرێ هاتینە بۆ پێشخستنا کەرتێ تەندروستی ل دەڤەرێ.
ئاکرێ و بەردەڕەش دوو دەڤەرێن مەزن یێن پارێزگەها دهۆکێ نە و پتری 300 هزار کەس تێدا دژین، پێکدهێن ژ دوو قەزا و شە ناحی و پتری 200 گوندان.