وەزیری بازرگانیی عێراق سەرجەم ئەو دەنگۆیانە رەت دەكاتەوە كە باس لە راگرتنی بەشەخۆراكی مانگانە دەكەن و دەڵێت، دابەشكردنی بەشەخۆراك سەقامگیریی دروست كردووە و ئێستە كۆگەكان پڕن لە خۆراك.
ئەسیر داود وەزیری بازرگانیی عێراق، لە پارێزگای سەڵاحەدین لە كۆنگرەیەكی ڕۆژنامەوانیدا رای گەیاند، هەموو پێویستییەكی خۆراك هەیە، ئێستە گەنمی پێویست بۆ ساڵێك هەیە و هیچ كێشەیەكمان نییە.
لەبارەی ئەو دەنگۆیانەی باس لە راگرتنی بەشەخۆراكی مانگانە دەكەن، وەزیری بازرگانیی عێراق گوتی، دابەشكردنی سەبەتەی خۆراك بەردەوام دەبێت و هیچ كێشەیەك لە بەشەخۆراكدا نییە، ئەو دەنگۆیانەش رەت دەكەینەوە.
باسی لەوەش كرد، هاووڵاتییان دڵنیا دەكەنەوە هیچ كێشەیەك لەگەڵ پێداویستیی خۆراكدا نییە، بەو پێیە دڵنیایی تەواویان هەیە و رۆڵیان هەیە لە پاراستنی ئەم سامانە كە بەشەخۆراكە و ئاسایشی نیشتمانیی دروست كردووە.
دواین هەوڵی وەزارەتەكەشی لەبارەی گۆڕانكارییەكان و چاكسازی لە بەشەخۆراك روون كردەوە و گوتی، لە هەوڵداین بۆ گۆڕینی كارتی بەشەخۆراك لە كاغەزەوە بۆ كارتی ئەلیكترۆنی، ئەمەش بۆ پێشكەشكردنی خزمەتگوزاری بە هاووڵاتییان و پێداچوونەوە و پێشكەوتنی وەزارەتی بازرگانی هاوشێوەی وڵاتانی دنیا، تا هاووڵاتییان بتوانن لە ماڵەوە لە رێی ئەپڵیكەیشنێكەوە هەموو كارەكانیان لەبارەی بەشەخۆراك ئەنجام بدەن.