شەوی ڕابردوو لە شارۆچكەی تەپەكۆی لە پارێزگای ئیزمیری توركیا، گەنجێكی تەمەن 25 ساڵان دایك و باوكی خۆی كووشت.
سەرچاوەیەكی پۆلیسی تەپەكۆی بە میدیاكانی ڕاگەیاندووە، كامیل یەڵماز گەنجێكی تەمەن 25 ساڵان بووە و پێشتر چەندان كەیسی بەكارهێنانی مادەی هۆشبەری هەبووە، شەوی رابردوو لەگەڵ دایك و باوكیدا دەماقاڵێی بووە تەقەی لێ كردوون و هەردووكیانی كوشتووە.
پۆلیس دەڵێت، سەڤیلای یەڵمازی تەمەن 48 ساڵ و حیكمەت یەڵمازی تەمەن 50 ساڵ، بەدەمانچەی كوڕەكەیان كوژراون و بكوژەكەیش بریندار بووە.
دوای رووداوەكە پۆلیس گەیشتوونەتە سەر كامیل یەڵماز و بەبرینداری گواستوویانەتەوە نەخۆشخانە.
كێشەی ئالوودەبوون و مادەی هۆشبەر لە توركیا بڵاوە و بەشێكی زۆر لە گەنجان ڕۆژانە بەكاری دێنن، توێژەرانی دەروونی و كۆمەڵایەتی پێیان وایە، ئەو گەنجانە بەو مادانە خۆیان لە سەختیی ژیانی ئابووری توركیا دەدزنەوە، بەڵام دواجار مادەی هۆشبەر كێشەكانیان گەورەتر دەكات.