ئێران هانا بۆ چین ده‌بات


حكوومه‌تی ئێران داوای یارمه‌تی له‌ كۆمپانیا هاورده‌كانی نه‌وتی چین ده‌كات بۆ به‌رده‌وامبوون له‌ كاره‌كانیان له‌گه‌ڵ تاران دوای ئه‌وه‌ی ئه‌مه‌ریكا سزای ئابووری به‌سه‌ر ئێران و ئه‌و كۆمپانیایانه‌ سه‌پاند كه‌ بازرگانی له‌گه‌ڵ حكوومه‌تی تاران ده‌كه‌ن.

ئاژانسی رۆیته‌رز له‌ هه‌واڵێكدا بڵاوی كردووه‌ته‌وه‌، سه‌عید خه‌شرۆ به‌ڕێوه‌به‌ری كۆمپانیای نێوده‌وڵه‌تی نه‌وتی ئێران له‌ چه‌ند كۆبوونه‌وه‌یه‌كی جیادا چاوی به‌ گه‌وره‌ به‌پرسان و به‌ڕێوه‌به‌ری كۆمپانیا نه‌وتییه‌كانی په‌كین كه‌وتووه‌ و له‌ كۆبوونه‌وه‌كه‌دا داوای پارێزگاری و به‌رده‌وامبوون له‌ بازرگانی و هاورده‌كردنی نه‌وت له‌ نێوان ئێران و چین كردووه‌.

ئێران له‌ هه‌وڵدایه‌ بۆ پارێزگاریكردن له‌ ڕێككه‌وتنی ناوكییه‌كه‌ی و به‌ره‌نگاربوونه‌وه‌ی سزاكانی كه‌ بازرگانییه‌ نه‌وتییه‌كانی له‌گه‌ڵ وڵاتان ده‌گرێته‌وه‌، دوای ئه‌وه‌ی له‌لایه‌ن حكوومه‌تی ئه‌مه‌ریكا و دۆناڵد تره‌مپه‌وه‌ به‌سه‌ری سه‌پێنرا، بۆ ئه‌م مه‌به‌سته‌یش داوای له‌ بازرگانان و كۆمپانیا نه‌وتییه‌كانی چین كردووه‌ بۆ به‌رده‌وامیدان به‌ هاورده‌كردنی نه‌وت له‌ ئێرانه‌وه‌، به‌ڵام هیچ گره‌نتی و دڵنیایییه‌كیان لێ وه‌رنه‌گرتووه‌. 

چین گه‌وره‌ترین هاورده‌كاری نه‌وتی ئێرانه‌ ڕۆژانه‌ نزیكه‌ی 655,000 به‌رمیل نه‌وت له‌ تارانه‌وه‌ بۆ چین هاورده‌ ده‌كات. 


وشە - په‌یام محه‌مه‌د


PM:01:03:16/05/2018




ئه‌م بابه‌ته 301 جار خوێنراوه‌ته‌وه‌‌