لە كاتێكدا ئۆپیك كۆ دەبێتەوە لەسەر هەڵسەنگاندن لە نرخ و بڕی خستنەڕووی نەوت لە بازاڕەكانی جیهانی بەپێی رێككەوتنی هاوبەشی نێوان وڵاتانی بەرهەمهێنی نەوت، عێراق داوا دەكات پشتگیری لە نرخی نەوت بكرێت.
ئەمڕۆ 18ی ئادار/ مارس، وەزیرانی نەوت و وزەی وڵاتانی بەرهەمهێنی نەوتی ئەندام لە
ئۆپیك و وڵاتانی بەرهەمهێنی نەوتی نائەندام لە ئۆپیك، كۆ دەبنەوە، ئامانجیش لە كۆبوونەوەكە هەڵسەنگاندنی رێككەوتنەكەی پێشتری نێوانیانە لە بارەی كەمكردنەوەی بەرهەمهێنانی نەوت.
سامر غەزبان وەزیری نەوتی عێراقی دەڵێ، وڵاتەكەی بە گرنگەوە پشتگیری لە نرخی نەوت و سەقامگیری نرخی نەوت دەڕوانێت، بۆ ئەمە لەگەڵ وڵاتانی بەرهەمهێنی نەوت دەكات چ لەناو ئۆپیك بێت یان دەرەوەی ئۆپیك كار دەكات بۆ رەخساندنی ژینگەیەكی گونجاو بۆ بازاڕەكانی نەوتی جیهانی لە رێی بڕی خستنەڕووی نەوت لە بازاڕەكانی دنیا.
قسەكەی غەزبان لە كاتێكدایە ئۆپیك و وڵاتانی بەرهەمهێنی نەوت لە رێككەوتنی پێشتردا بڕیاریان دا بڕی ملیۆنێك و 200 هەزار بەرمیل نەوت كەمتر بەرهەم بهێنن، لەمەشدا بەگوێرەی بەیاننامەیەكی وەزارەتی نەوتی عێراق، لە ماوەی رابردوودا تا دوێنێ 17ی ئادار، عێراق 220 هەزار بەرمیل نەوتی كەمتر بەرهەم هێناوە وەك پابەندییەك بە رێككەوتنەكەی ئۆپیك.
كۆبوونەوە ئامادەكارییەكەی وەزیرانی دەرەوەی ئۆپیك و وڵاتانی بەرهەمهێنی نەوت، ئەمڕۆ لە باكۆی پایتەختی ئازربەیجان بەڕێوە دەچێت، لە مانگی حوزەیرانی داهاتووشدا كۆبوونەوەی فراوانی ئۆپیك و وڵاتانی بەرهەمهێنی نەوت لە ڤیەننای پایتەختی نەمسا كە بارەگای سەرەكی ئۆپیكی لێیە، بەڕێوە دەچێت و تێیدا هەڵسەنگاندنی فراوان و هەمەڕەهەند بۆ رێككەوتنەكەی مانگی ئەیلوولی رابردوو دەكەن لە بارەی كەمكردنەوەی بەرهەمهێنانی نەوت بۆ بازاڕەكانی دنیا بە مەبەستی جێگیركردن و بەرزكردنەوەی نرخی بەرمیلێك نەوت بۆ 70 دۆلاری ئەمەریكی.
غەزبان گوتی "كۆبوونەوەكە چاودێریكردنی نرخی نەوتە لە رێی كەمكردنەوەی بەرهەمهێنانی نەوت بەگوێرەی رێككەوتنەكەی كۆتایی ساڵی رابردوو كە بۆ ماوەی شەش مانگ بوو، واتە مانگی حوزەیرانی داهاتوو تەواو دەبێت"،. زیاتر گوتی "بەشێكی تری كۆبوونەوەكە هەڵسەنگاندنی راپۆرتی لیژنە تایبەتمەندەكانی ئۆپیك و وڵاتانی بەرهەمهێنی نەوتە لە بارەی پابەندی بە كەمكردەوەی نەوت".