نرخی نەوت دابەزی

ئەمڕۆ دووشەم هەفتەیەکی نوێ لە بازاڕی بۆرسە کرایەوە و نرخی نەوتیش هەر لەگەڵ کردنەوەی بازاڕەکە رووی لە دابەزین کردووە و تا ئامادەکردنی ئەم هەواڵە لە دابەزین بەردەوام بووە.

هەفتەی رابردوو نرخی نەوت بە 71دۆلار و 70 سەنت داخرابوو، بەڵام ئێستە بە 70دۆلار و 96 سەنت دەفرۆشرێت و ئەمەش دەری دەخات نرخی هەر بەرمیلێک نەوت 74سەنت دابەزیوە.

بەگوێرەی dailyfxنرخی نەوتی جۆری تەکساسی ئەمەریکیش کە بە هێمای WTIناسراوە لە 63 دۆلار و 75 سەنتەوە بۆ 63 دۆلار و 31 سەنت دابەزیوە.

هەر چەندە نرخی نەوت لە ژێر کاریگەری پێشبینی دابەزینی گەشەی ئابووری جیهان کەمێک دابەزیوە بەڵام ئەگەری زۆرە دابەزینەکە کاتیی بێت و دووبارە رووی لە هەڵکشان بکاتەوە.

رۆژی هەینی نرخی نەوت بۆ بەرزترین ئاستی لە ماوەی پێنج مانگی رابردوو هەڵکشابوو. لیبیا هۆشداری داوە بەردەوامیی جەنگ  و نائارامییەکان لەو وڵاتە لەوانەیە بە تەواوی هەناردەی نەوت بوەستێنێت.

جگەلەمە سزاکانی ئەمەریکا لە دژی ئێران و ڤەنزوێلاش کە بەشێک لە نەوتی وڵاتانیان دابین دەکرد بەردەوامە و بووەتە هۆی کەمبوونەوەی خستنەرووی نەوت لە بازارەکان و هەر ئەوەش هۆکار بووە لەوەی لە ماوەی رابردوودا نرخی نەوت بەرز ببێتەوە.

ئۆپێک و هاوپەیمانەکانی لە مانگی حوزەیرانی ئەمساڵ کۆ دەبنەوە و لەبارەی دوایین هەنگاوەکانیان بۆ بەرهەمهێنانی نەوت بڕیار دەدەن. ئەوان لە کۆتایی ساڵی رابردوو بڕیاریان دا بەرهەمهێنانی نەوت بە بڕی ملیۆنێک و 200 هەزار بەرمیل لە رۆژێکدا کەم بکەنەوە و بڕیارەکەش لە سەرەتای ئەمساڵەوە جێبەجێ کراوە.