بروسك رۆژهه‌ڵاتی
گه‌ڵه‌ك جاران ژ خوه دپرسم، گه‌لۆ چه‌ند عه‌ره‌ب یان ژی چه‌ند فارس و تورك گوهداریا موزیك و سترانێن كوردی دكه‌ن، دیاره گه‌له‌ك كێمن و ب تیلێن ده‌ستان تێن هه‌ژمارتن، لێ ئه‌گه‌ر پسیارێ بگوهه‌رم و بپرسم چه‌ند وه‌ڵاتیێن كورد گوهداریا سترانێن عه‌ره‌بی، فارسی و توركی دكن؟، دوور نینه كۆ به‌رسڤا وێ پسیارێ، چه‌ندان ملیون بن.
ئه‌رێ باشه سه‌ده‌ما مه‌زن یا وێ دیاردێ چییه، مخابن و سه‌د جار مخابن بۆ میله‌ته‌كێ بنده‌ست و بێ ده‌وله‌ت، مینا كوردا كو ب وی ئاوایی عاشقێ سترانێن داگیركه‌رێن وه‌ڵاتێ خۆ دبن، گه‌لۆ ل به‌ر وێ ئێكێ یه كۆ ئه‌م كورد ناچار كرنه زمانێ وان فێربن، گه‌لۆ ل به‌ر وێ ئێكێ یه كۆ ئاستا موزیكا كوردی ل هه‌ر چار په‌رچه‌یێن كوردستانێ هێند نزم و لاوازه كۆ گه‌لێ كورد ب ئاوایه‌ك به‌رفره‌هـ گوهداریا وێ ناكه‌ن؟. گه‌لۆ ل به‌ر وێ ئێكێ یه كۆ مله‌تێ كورد د خه‌ما پاراستنا چاند و هونه‌را خۆ دا نینه، یان ژی ل به‌ر وێیه كۆ ئه‌م كورد هه‌تا بێژن نه‌ته‌وه‌ك ساده‌نه و نزانین قازانجا مه د كیده‌رێ دایه؟. یان ژی ل به‌ر وێیه كۆ ئه‌م كورد میله‌ته‌ك ره‌وشه‌نبیر و هزردار نینن. بۆ میناك ل باشوورێ كوردستانێ، گه‌له‌ك ب شاشی ژ واته‌یا دێمۆكراسی، ئازادی و سه‌رخوه‌بوونێ تێگه‌هه‌شتنه ب ئاوایه‌كێ كۆ هێشتا د قالبێ وه‌ڵاتیێ ده‌رجه دوو نهاتنه ده‌ر.
ل به‌ر وێیه كۆ مه‌دیایێن كوردی ل ئاستا داخازان نینن و هه‌تا نه‌شێن چاند و هونه‌را كوردان ب وه‌ڵاتێن جینار بده‌نه ناساندن و ب ئاوایه‌كێ رێكوپێك ڤه‌گوهێزن بۆ ماڵان. یانژی ژبه‌ر وێیه كۆ غه‌ینی چه‌ند چالاكیێن بچیك یێن هونه‌ری و ده‌مكی، به‌رهه‌مێن كوردی هێند كێمن كۆ نه‌شێن مل ب ملێ هونه‌رمه‌ندێن وه‌ڵاتێن جینار كێبركێ بكه‌ن. یانژی ل به‌ر وێ ئێكێ یه كۆ پرانیا مه حه‌ژ چاندا بیانی دكه‌ن. یانژی ئه‌م مله‌ته‌ك چاڤلێكه‌رن و وسا دفكرن كۆ گوهداریا سترانێن بیانی، مه وه‌ك كه‌سه‌ك پێشكه‌فتی نیشان دده‌ت. یانژی سیاسه‌توانێن كورد ب گشتی نه‌گه‌هه‌شتنه وێ باوه‌ریێ، كۆ چاندا هه‌ر مله‌ته‌كێ ب تایبه‌تی ژی ستران (لاڤژه ئان كو لاوك) و موزیك گه‌له‌ك گه‌له‌ك گرینگن.
ئه‌م گه‌لێ كورد كۆ چه‌ندان ساڵه خه‌بات ژ بۆ چێكرنا وه‌ڵاته‌ك سه‌ربه‌ست دكه‌ن، ژ نانێ شه‌ڤێ زێده‌تر پێویستیا مه ب پاراستنا چاندا كوردی هه‌یه. ئیرۆ ژ هه‌ر ده‌مێ بێتر، پێویستیا مه ب چاند و كولتوورێ هه‌یه.
ب نێرینا من، هه‌موو ئه‌ڤ سه‌ده‌مێن كۆ من دان خویاكرن، روڵه‌ك به‌رچاڤ د حه‌ژێكرنا مه ب سترانێن بیانی هه‌یه و راستكرنا وان شاشتییان تنێ ئه‌ركێ حكوومه‌ت و سازیێن هونه‌ری و مه‌دیایان نینه، به‌ڵكو هه‌ریه‌ك ژ مه و د جهێ خودا و لگۆری شیانێن خو، به‌رپرسێ وێ دیارده‌یا خرابن.
گه‌له‌ك جاران دپرسن حكوومه‌تێ بۆ مه چ كریه؟ لێ چ جاران وه ژ خوه پرسیه كۆ بخۆ بۆ وه‌ڵاتێ خۆ چ پێنگاڤه‌ك ئاڤێتییه؟
وه‌ك باب و كالێن مه دبێژن "ل مه گۆتن و ژ وه بهیستن"