بڕیارە لەو هەفتەیە كۆتایی بێت بە دابەشكردنی خشتەی مووچەی مانگی تشرینی دووەمی ساڵی 2018 و هەموو وەزارەت و فەرمانگەكان مووچە وەربگرن.
ئەمڕۆ یەكشەم 17ـی شوبات، بە گوێرەی ئەو زانیارییانەی لە یەكێك لە بانكەكان بە "وشە" دراوە و تێیدا هاتووە، ڕۆژی دووشەم مووچەی ئەنجوومەنی ئاسایش و دەزگای گشتی ئاسایش و هێزەكانی زێرەڤانی و هێزی بەرگریی فریاكەوتن و پۆلیسی نەوت و گاز دەدرێت.
ئەو سەرچاوەیە ئاشكرای كرد، رۆژی سێشەم مووچەی هەریەك لە وەزارەتەكانی شارەوانی و گەشتوگوزار و كشتوكاڵ، كارەبا و پلاندانان و گواستنەوە و گەیاندن دابەش دەكرێت.
هەروەها ڕۆژی سێشەم مووچەی هەریەك لە دەستەكانی دیوانی چاودێری دارایی و دەستەی مافی مرۆڤ و دەستەی وەبەرهێنان و دەستەی دەستپاكی و دەستەی ژینگە و دەستەی گشتی ناوچە كوردستانییەكانی دەرەوەی ئیدارەی هەرێم و كۆمیسیۆنی هەڵبژاردن و دەزگای گشتی كاروباری مین دابەش دەكرێت.
رۆژانی چوارشەم وەزارەتی پیشەسازی و بازرگانی و وەزارەتی رۆشنبیری و وەزارەتی ئاوەدانكردنەوە سەرۆكایەتی هەرێم و سەرۆكایەتی پەرلەمان و ئەنجوومەنی وەزیران دابەش دەكرێت.
رۆژی پێنجشەم خانەنشینانی سەربازی و ڕۆژی یەكشەم خانەنشینانی مەدەنی دابەش دەكرێت و كۆتایی بە مووچەی مانگی 11 دێت.